SIV eignastýring hf. er dótturfélag Skaga hf. Fjárhagsupplýsingar samstæðu Skaga er að finna á heimasíðu Skaga.

Vátryggingafélag Íslands hf (Skagi): 140.040.000 (70%)

YNWA ehf: 19.980.000 (10%). 
Endanlegur eigandi: Arnór Gunnarsson

Salka2 ehf: 19.980.000 (10%). 
Endanlegur eigandi: Þorkell Magnússon

Maldini ehf: 6.000.000 (3%). 
Endanlegur eigandi: Guðmundur Oddur Eiríksson

RHA ehf: 6.000.000 (3%) 
Endanlegur eigandi: Sævar Ingi Haraldsson  

Guðrún Una Valsdóttir: 4.000.000 (2%)       

JIN ehf: 4.000.000 (2%)
Endanlegur eigandi: Jón Rúnar Ingimarsson

Ármúli 3, 108 Reykjavík. Kt: 581022-0850

VÍS hefur ákveðið að útvíkka starfsemi sína og bjóða upp á sjóða- og eignastýringu.

Stofnað verður nýtt dótturfélag undir starfsemina sem hlýtur nafnið SIV eignastýring (siveignastyring.is). Félagið mun í framhaldi sækja um starfsleyfi til eignastýringar og rekstrar sjóða — en stefnt er að því að starfsemi félagsins hefjist um leið og starfsleyfi frá Seðlabanka Íslands liggur fyrir.

Árangur VÍS í fjárfestingum hefur verið mjög góður á undanförnum árum. Fjárfestingartekjur félagsins frá árinu 2018 nema um 21 milljarði króna og telja fjárfestingareignir þess nú um 45 milljarða króna. Fjárfestingar eru önnur af tveimur grunnstoðum í starfsemi VÍS — og því fellur eignastýring vel að starfsemi félagsins. VÍS mun fela SIV eignastýringu að stýra fjárfestingareignum sínum.

VÍS mun eiga ráðandi hlut í SIV eignastýringu — og mun eitt fara með virkan eignarhlut í félaginu. Aðrir helstu hluthafar verða Arnór Gunnarsson, nú forstöðumaður fjárfestinga hjá VÍS, og Þorkell Magnússon, sem starfað hefur sem forstöðumaður sjóðastýringar Kviku banka — en þeir munu jafnframt starfa hjá félaginu. Arnór Gunnarsson verður framkvæmdastjóri SIV eignastýringar, en hann hefur starfað á íslenskum fjármálamarkaði síðan 2001. Þorkell verður forstöðumaður sjóðastýringar hjá SIV eignastýringu, en reynsla hans á fjármálamarkaði nær aftur til ársins 1998. Áður störfuðu Arnór og Þorkell saman hjá Öldu sjóðum, Stefni og Kaupþingi.

Tækifæri á íslenskum fjármálamarkaði

Örar samfélagsbreytingar kalla á stöðuga endurskoðun á þjónustuframboði, ekki síst í trygginga- og fjármálaþjónustu. Þessi útvíkkun á starfsemi VÍS endurspeglar þá þróun sem hefur átt sér stað víða í Evrópu þar sem tryggingafélög hafa boðið upp á fjölbreyttari trygginga-og fjármálaþjónustu. Á undanförnum árum hefur verðbréfamarkaður verið að byggjast upp hér á landi og hefur fjárfestingakostum í skráðum verðbréfum fjölgað til muna. Á sama tíma hefur þátttakendum á markaði fjölgað talsvert með aukinni þátttöku almennings á skráðum hlutabréfamarkaði og uppfærslu Íslands í flokk nýmarkaðsríkja hjá alþjóðlega vísitölufyrirtækinu FTSE Russell. Því er ljóst að spennandi tækifæri eru til staðar á íslenskum fjármálamarkaði.

SIV eignastýring fær starfsleyfi frá Seðlabanka Íslands

Fjármálaeftirlit Seðlabanka Íslands hefur veitt SIV eignastýringu hf. starfsleyfi sem rekstraraðili sérhæfðra sjóða með viðbótarheimild til eignastýringar auk móttöku og miðlun fyrirmæla varðandi fjármálagerninga. 

SIV, sem er dótturfélag VÍS, var stofnað árið 2022. Boðið verður upp á sérhæfða fjármálaþjónustu fyrir almenning og fagfjárfesta. Arnór Gunnarsson, fyrrum forstöðumaður fjárfestinga hjá VÍS, er framkvæmdastjóri félagsins.

Við þessi tímamót verða starfsmenn fjárfestinga VÍS, þeir Arnór Gunnarsson og Guðmundur Oddur Eiríksson, nú starfsmenn hjá SIV eignastýringu. Samhliða þessu færist stýring fjárfestingareigna VÍS til SIV eignastýringar en safnið var 44 milljarðar króna við lok fyrsta ársfjórðungs.

Auk Arnórs starfa þrír starfsmenn hjá SIV eignastýringu. Þorkell Magnússon, er forstöðumaður sjóðastýringar, Guðmundur Oddur Eiríksson er sjóðstjóri í eignastýringu og Sævar Haraldsson er sjóðstjóri í sjóðastýringu. Þar að auki mun Sigurður Ottó Þorvarðarson hefja störf hjá félaginu í ágúst næstkomandi.

SIV eignastýring mun á næstu vikum stofna fyrstu sjóðaafurðir félagsins, þar sem bæði verður boðið upp á sérhæfða sjóði fyrir almenning og sérhæfða sjóði fyrir fagfjárfesta. Viðskiptavinum félagsins mun einnig standa til boða sérhæfð stýring á eignasafni þeirra en sú þjónusta er sniðin að fagfjárfestum, t.a.m. lífeyrissjóðum, fyrirtækjum og öðrum stofnanafjárfestum. Rík áhersla verður lögð á virka stýringu á fjármunum með áherslu á traust og langtímaárangur.

Arnór Gunnarsson, framkvæmdastjóri SIV eignastýringar:

„Við fögnum þessum góðu tímamótum að starfsleyfi sé komið fyrir SIV eignastýringu, félag sem stofnað var frá grunni í september á síðasta ári. Á næstu vikum mun öflugt teymi félagsins kynna fjölbreytt úrval fjárfestingarkosta í sjóða- og eignastýringu. Við hlökkum til að leggja okkar af mörkum til þess að hjálpa viðskiptavinum okkar að ná góðum árangri í fjárfestingum sínum.“

Tveir nýir starfsmenn hjá SIV eignastýringu

SIV eignastýring hlaut starfsleyfi sem rekstraraðili sérhæfðra sjóða í júní síðastliðnum en félagið var stofnað á síðasta ári og er með um 60 milljarða króna í stýringu. Félagið hefur nú ráðið til sín tvo öfluga starfsmenn, þau Guðrúnu Unu Valsdóttur og Jón Rúnar Ingimarsson, en starfsmenn félagsins eru nú orðnir sjö talsins.

Una hefur verið ráðin sem sjóðstjóri í skuldabréfateymi félagsins en hún hefur yfir tuttugu ára reynslu í eignastýringu. Hún starfaði nú síðast sem sjóðstjóri hjá Glym hf., dótturfélagi Fossa fjárfestingarbanka, en áður starfaði hún hjá Landsbréfum/Landsbankanum. Þar stýrði hún skuldabréfateymi rekstrarfélags bankans, starfaði sem verðbréfamiðlari og var fjárfestingarstjóri í eignastýringarteymi bankans sem meðal annars stýrir Íslenska lífeyrissjóðnum.

Una nam viðskiptafræði við Háskóla Íslands, lauk þaðan meistaragráðu í fjármálum (M.Sc.) árið 2002 og hefur lokið prófi í verðbréfaviðskiptum. Þá er Una einnig með B.A. próf í sálfræði frá Háskóla Íslands og hefur lokið framhaldsnámi í félagsráðgjöf frá Háskóla Íslands.

Jón Rúnar hefur verið ráðinn sem sjóðstjóri hlutabréfa en hann starfaði áður sem sjóðstjóri erlendra hlutabréfa hjá Stefni hf. og í markaðsviðskiptum hjá Kviku og Landsbankanum. Jón Rúnar lauk meistaragráðu í fjármálum (M.Sc.) frá Esade viðskiptaháskólanum í Barcelona á Spáni árið 2021. Hann lauk jafnframt B.S. gráðu í viðskiptafræði frá Háskólanum í Reykjavík árið 2016. Jón Rúnar hefur einnig lokið prófi í verðbréfaviðskiptum.

Þau hefja bæði störf hjá félaginu í desember. Una hefur störf hjá SIV eignastýringu samhliða færslu rekstrar Glyms til SIV eignastýringar, en sameining VÍS og Fossum fjárfestingarbanka er frágengin.

Arnór Gunnarsson, framkvæmdastjóri SIV eignastýringar

„Við bjóðum upp á fjölbreytt úrval sjóða fyrir almenna fjárfesta og fagfjárfesta auk eignastýringar hjá SIV eignastýringu. Ég fagna komu Unu og Jóns Rúnars til okkar, en ég tel að reynsla þeirra og menntun eigi eftir að styrkja félagið enn frekar til framtíðar. Ég býð þau hjartanlega velkomin til okkar.“

SIV eignastýring stofnar 10,5 ma.kr. sjóð um fjármögnun fyrirtækja

SIV eignastýring hefur lokið fjármögnun á nýjum sjóði sem ber nafnið SIV Credit Fund slhf. Sjóðurinn er samlagshlutafélag sem kemur að fjármögnun lítilla og meðalstórra fyrirtækja og mun fjárfesta í skuldabréfum og lánum til fyrirtækja, að mestu með veði í fasteignum og öðrum fastafjármunum. Heildaráskriftarloforð sjóðsins nema 10,5 milljörðum króna og eru eigendur sjóðsins margir af stærstu fagfjárfestum landsins. 

Rekstraraðili sjóðsins er SIV eignastýring hf. Heildareignir í stýringu félagsins eru um 60 ma.kr. en félagið fékk starfsleyfi í júní 2023.  

Framkvæmdastjóri sjóðsins er Þorkell Magnússon, sem jafnframt er forstöðumaður sjóðastýringar hjá SIV eignastýringu. Þorkell hefur yfir 20 ára reynslu af eigna- og sjóðastýringu og hefur komið að rekstri sjóða um fjármögnun fyrirtækja í meira en áratug.  

Þorkell Magnússon, framkvæmdastjóri SIV Credit Fund slhf.: 

,,Það er ánægjulegt að tilkynna um stofnun á nýjum sjóði á þessum áhugaverðu tímum. Mikil breyting hefur orðið á vaxtaumhverfinu en í rekstri sjóðsins munum við leggja áherslu á að finna góða fjárfestingarkosti og veita fjárfestum aðgengi að áhugaverðum lánamarkaði.“ 

Arnór Gunnarsson, framkvæmdastjóri SIV eignastýringar:  

,,Stofnun á SIV Credit Fund er jákvætt skref í uppbyggingu á SIV eignastýringu. Við sjáum mikil tækifæri á lánamarkaði og teljum að sá markaður muni vaxa enn frekar. Stofnun SIV Credit Fund er einn liður í þeirri vegferð og er ánægjulegt að sjá það traust sem fjárfestar sýna félaginu.“ 

Nánari upplýsingar veitir Þorkell Magnússon, forstöðumaður sjóðastýringar hjá SIV eignastýringu, í síma 854-1090.

Þorkell Magnússon til SIV eignastýringar

Þorkell Magnússon hefur verið ráðinn sem forstöðumaður sjóðastýringar hjá SIV eignastýringu. 

Þorkell hefur umtalsverða reynslu úr fjármálageiranum því hann hefur starfað í geiranum undanfarin 25 ár. 

Þorkell var áður forstöðumaður sjóðastýringar hjá Kviku eignastýringu hf. og var þar á undan forstöðumaður skuldabréfa hjá Öldu sjóðum. Hann var jafnframt forstöðumaður skuldabréfasviðs hjá Stefni hf. auk þess að vera staðgengill framkvæmdastjóra félagsins. Þorkell gegndi þar áður stöðu sjóðstjóra innlendra og erlendra skuldabréfasjóða hjá Rekstrarfélagi Kaupþings ásamt því að taka þátt í þróun á sérhæfðum fjárfestingum hjá félaginu. Hann er verkfræðingur frá Háskóla Íslands og er með meistaragráðu í iðnaðarverkfræði frá University of Minnesota. Þorkell hefur jafnframt lokið prófi í verðbréfaviðskiptum. Þorkell hefur nú þegar hafið störf.

Arnór Gunnarsson, framkvæmdastjóri SIV eignastýringar: 

„Það er afar ánægjulegt að fá jafn öflugan starfsmann til starfa fyrir félagið. Ég tel að víðtæk reynsla hans og menntun muni styrkja félagið enn frekar. Við hlökkum til að bjóða upp á fjölbreytt framboð sjóða, auk eignastýringar, um leið og félagið fær starfsleyfi.“

Sævar Haraldsson til SIV eignastýringar

Sævar Haraldsson hefur verið ráðinn sem sjóðstjóri skuldabréfasjóða hjá SIV eignastýringu auk þess að vera hluti af „kredit“ teymi félagsins.

Undanfarin sex ár hefur Sævar starfað hjá Stefni hf. sem sjóðstjóri skuldabréfasjóða. Áður starfaði hann sem skuldabréfamiðlari hjá Fossum mörkuðum. Sævar hefur einnig starfað hjá Arion banka í skuldabréfa- og gjaldeyrismiðlun. Sævar er verkfræðingur frá Háskóla Íslands og meistaragráðu í fjármálastærðfræði frá Boston University. Hann hefur jafnframt lokið námi í verðbréfaviðskiptum.

Viðskiptavinum býðst 100% afsláttur af gjaldi við kaup í sjóðum SIV eignastýringar. Afslátturinn er ótímabundinn og á við um alla opna sjóði félagsins.

Hægt er að eiga viðskipti í sjóðum með því að senda tölvupóst á sjodir@fossar.is eða í gegnum sinn viðskiptabanka. Allar almennar fyrirspurnir skulu berast á sjodir@siveignastyring.is.

Lágmarks afgreiðslugjald kann að vera rukkað og fer það eftir verðskrá viðkomandi banka. Ekkert afgreiðslugjald er vegna kaupa í gegnum Fossa fjárfestingarbanka.

SIV býður upp á fjölbreytta valkosti fyrir almenning og fagfjárfesta. Vöruúrval SIV byggir á því að viðskiptavinir geti fundið sjóð sem hentar sínu áhættuþoli, fjárfestingatíma og væntingar um ávöxtun.

Áhætta fylgir ávallt fjárfestingu í sjóðum, hlutdeildarskírteini sjóða geta lækkað í verði ekki síður en hækkað og eru því ekki áhættulaus. Ávöxtun í fortíð er engin trygging fyrir ávöxtun í framtíð. Einungis er greiddur fjármagnstekjuskattur þegar fjárfestir selur eða innleysir eign sína í sjóði.

Sjóðirnir eru reknir af SIV eignastýringu hf., sem er með starfsleyfi sem rekstraraðili sérhæfðra sjóða á Íslandi og lýtur eftirliti Fjármálaeftirlits Seðlabanka Íslands. Lágmarksfjárhæð við kaup í sjóðum er 10.000 krónur.

Viðskiptavinum er bent á að kynna sér vel útboðslýsingu og lykilupplýsingar sjóða áður en fjárfest er í þeim.

Hreggviður Ingason hefur tekið við sem fjárfestingarstjóri hjá SIV eignastýringu og kemur inn í eignastýringarteymi félagsins frá Fossum fjárfestingarbanka, en bæði félögin tilheyra samstæðu Skaga. 

Nýlega var gerð sú breyting innan samstæðu að stýring sérgreinda safna og eignaleiða hjá Fossum fjárfestingarbanka var færð frá bankanum yfir til SIV eignastýringar sem skapar hagræði fyrir samstæðuna og ekki síst, enn betri umgjörð eignastýringar fyrir viðskiptavini samstæðunnar. Eignir í stýringu hjá samstæðu Skaga munu aukast umtalsvert eftir sameiningu við Íslensk verðbréf hf. og verða eignir í stýringu þá um 220 milljarðar.*

Hreggviður hefur víðtæka reynslu í fjármálum en hann hefur yfir 20 ára reynslu af fjármálamörkuðum, nú síðast sem forstöðumaður eignastýringar hjá Fossum fjárfestingarbanka. Áður var hann forstöðumaður eignastýringar hjá Lífsverki lífeyrissjóði, forstöðumaður afleiðusafns hjá hjá slitastjórn Glitnis og forstöðumaður fjárstýringar VBS fjárfestingarbanka. Hreggviður er með B.Sc. gráðu í hagfræði frá Háskóla Íslands. Hann hefur lokið meistaragráðu í hagfræði frá Boston University og meistaragráðu í fjármálastærðfræði frá University of Warwick í Bretlandi. Hreggviður hefur einnig lokið námi í verðbréfaviðskiptum.

„Það er mikill fengur að fá Hreggvið í teymið okkar því hann býr yfir umfangsmikilli þekkingu á fjármálamörkuðum. Ekki er nema ár síðan SIV eignastýring var stofnað og erum við nú með 90 milljarða í stýringu, en við bjóðum upp á fjölbreytt úrval sjóða fyrir almenna fjárfesta og fagfjárfesta, auk eignastýringar. SIV tilheyrir samstæðu Skaga sem hyggur á enn frekari vöxt á fjármálamarkaði, meðal annars á sviði eignastýringar. Ég er þess fullviss að reynsla hans og menntun muni styrkja okkur enn frekar á vegferðinni framundan.

Kaup Skaga á Íslenskum verðbréfum voru gerð með fyrirvara um samþykki Fjármálaeftirlits Seðlabanka Íslands og Samkeppniseftirlitsins. Fyrirvara um samþykki Samkeppniseftirlitsins hefur verið aflétt og telur Samkeppniseftirlitið ekki forsendur til þess að aðhafast vegna kaupanna. Gengið hefur verið frá kaupsamningi en eftir stendur fyrirvari um samþykki Fjármálaeftirlits Seðlabanka Íslands fyrir því að Skagi fari með yfir 50% eignarhlut í Íslenskum verðbréfum og dótturfélagi þess, ÍV sjóðum. Framundan er því samþætting Íslenskra verðbréfa í samstæðu Skaga, að fengnu samþykki Fjármálaeftirlits Seðlabanka Íslands og þegar kaupin eru frágengin.

Það gleður okkur að segja frá því að nú er hægt að fjárfesta í sjóðum SIV eignastýringar í gegnum heimasíðu félagsins. 

Til þess að fjárfesta rafrænt þarf að nýskrá sig sem viðskiptavin SIV eignastýringar og fara í gegnum einfalt kaupferli.

Viðskiptavinir SIV eignastýringar fá 100% afslátt af gengismun vegna viðskipta með sjóði félagsins.